АКШнын Иранга каршы согушу – өлкө тарыхындагы колдоосу эң төмөн согуш
АКШнын Иранга каршы согушу – өлкө тарыхындагы колдоосу эң төмөн согуш
АКШ тарыхында биринчи жолу президент олуттуу коомдук колдоого ээ болбостон өлкөнү ири куралдуу жаңжалга тартты. 2026-жылдын 28-февралында президент Дональд Трамптын тушунда «Израил» менен биргеликте башталган АКШнын Иранга каршы аскердик кампаниясы америкалыктар арасында тарыхтагы эң популярдуу эмес согуш болуп калды.
CNN жана SSRS жүргүзгөн сурамжылоого ылайык, америкалыктардын 41%ы Иранга жасалган соккуларды колдойт, 59%ы каршы, алардын ичинен 31%ы аскердик операцияны кескин колдобойт.
The New York Times басылмасынын анализине ылайык, азыркы согуштун башындагы элдин колдоо деңгээли акыркы 90 жылда АКШ алып барган бардык ири аскердик кампаниялардын ичинен эң төмөнү болуп калды.
NYT маалыматы боюнча, жаңжалдын алгачкы күндөрүндө операцияны колдогондордун саны 27%дан 41%га чейин гана болгон. Салыштыруу үчүн айтсак, 2003-жылы Иракка каршы согушту америкалыктардын 76%ы колдогон, 2001-жылы Афганистанга каршы согушту 92%ы, Экинчи дүйнөлүк согушта АКШнын согушка киришин 97% америкалыктар колдогон. Кошумча сурамжылоолор көрсөткөндөй, АКШ тургундарынын 55%ы Иранга каршы соккулар башталганга чейин бул өлкө АКШга түздөн-түз коркунуч жараткан эмес деп эсептешет.
NYT анализинде дагы белгиленгендей, АКШ катышкан көптөгөн согуштар убакыт өткөн сайын калктын колдоосун жоготуп келген. Бирок алардын көбү башында америкалыктар тарабынан колдоого алынган. Ал эми Иранга каршы аскердик операция андай баштапкы коомдук колдоого ээ эмес. Бул жагынан ал АКШ катышкан көптөгөн согуштардан айырмаланат.
АКШ тарыхындагы көпчүлүк куралдуу жаңжалдарда жарандар президенттин согушка кирүү чечимин колдошкон. Алардын пикири согуш узакка созулуп, жоготуулар көбөйгөндө гана өзгөрө баштаган. Мындай учурда америкалыктар тез жеңишке ишенбей, нааразычылыгын билдире башташат. Ал эми азыркы кырдаалда, NYT журналисттеринин божомолунда, бул этап согуштун эң башында эле башталышы мүмкүн. Себеби болуп жаткан окуялар жаңжалдын жакын арада бүтпөй турганын көрсөтүп турат.
