Орозо  жана Куран  кыямат күнү адамга шапаат кылат

Бисмиллаахи рахмаанир рахиим

Асыл хадис менен

Орозо  жана Куран  кыямат күнү адамга шапаат кылат

Урматтуу бир туугандар “Асыл хадис менен” берүүбүздүн жаңы чыгарылышын жакшы салам менен баштайбыз. Аллахтын тынчтыгы, ырайымы жана берекеси сиздер менен болсун.

عن عبد الله بن عمرو أن رسول الله صلى الله عليه وسلم قال: “الصيام والقرآن يشفعان للعبد يوم القيامة، يقول الصيام: أي رب، منعته الطعام والشهوات بالنهار فشفِّعني فيه، ويقول القرآن: منعته النوم بالليل فشفعني فيه، قال: فيُشفَّعان” رواه أحمد وصححه الألباني

Абдулла бин Амр (р.а) айтты, Аллахтын элчиси (ага Аллахтын салаваттары жана саламдары болсун) айтты: Орозо жана Куран Кыямат күнү пенде үчүн шапаат кылат. Орозо мындай дейт: “Оо, Жараткан, мен аны күндүз тамак-аштан жана каалоолордон тыйдым, ошондуктан мени ага шапаатчы кыл.  Куран айтат: Мен аны түнкүсүн уйкудан тыйдым, ошондуктан мени ага шапаатчы кыл. Ошентип, алар ага шапаат кылышат”.  Ахмад риваят кылган жана аль-Альбани сахих деген.

Урматтуу бир туугандар:

Эң жакшы сөз – бул Улуу Аллахтын сөзү, ал эми эң жакшы жол – бул Анын Пайгамбары (ага Аллахтын салам-салаваттары болсун) Мухаммаддын жолу.

Бул асыл хадис эки нерсеге ишарат кылат: биринчиси, орозо кармоо жана тамак-аштан жана суусундуктан баш тартуу, экинчиси, бул ыйык айда Куран окуп, анын маанилери жөнүндө ой жүгүртүү. Рамазан айында орозо кармоонун чоң хикматы бар, анткени Аллах Таала орозону парз кылып, аны Өзү үчүн кылган жана ал үчүн өзү сыйлык берет. Кыямат күнү ал ээси үчүн күбөлүк берип, ага шапаат кылат, орозо кармаган адамдын күнөөлөрүн кечирүүсүн Аллах Тааладан суранат.

Бул жерде биз орозо кармоонун бизге күбө же бизге каршы күбө болорун түшүнүшүбүз керек. Эгерде биз Аллахтын ыраазылыгынан башка нерсе үчүн орозо кармап, адамдардын мактоосуна жана алкоосуна ээ болууну кааласак, анда биз ачкачылык менен суусаганга гана дуушар болобуз, ал эми орозо кармоо Кыямат күнү бизге каршы күбө болот. Эгер биз Аллах Таала буйругандай орозо кармап, ошону менен Аллах Тааланын ыраазычылыгын издесек, анда орозо Кыямат күнү бизди коргоп, биз үчүн кечирим, сооп жана ырайым суроо үчүн шапаатчы болуп келет.

Ал эми Куранды окуп, анын маанилери жөнүндө ой жүгүртүүгө келсек, ал же бизге  күбө болот, же бизге каршы күбө болот. Эгерде биз анын барактарын карап чыгып, анда эмне бар экенин билбесек жана маанилери жөнүндө ойлонбосок, анда Куран Кыямат күнү бизге каршы күбө болот.

Бирок, эгер биз бул ишти аткарып, Куранда эмнелер жөнүндө айтылганын үйрөнүп, Аллахтын өкүмдөрү менен мыйзамдарында эмнеден баш тартканыбызды карап чыгып, билбеген жана унуткан күнөөлөрүбүз үчүн Аллахтан кечирим сурасак,  анда Куран Кыямат күнү биз үчүн күбө болуп келет, Аллахтын азабынан жана тозок отунан коргоочу чеп жана калкан, ошондой эле биз андан эмне окусак, ага амал кылуу жана адамдарга үйрөтүү үчүн гана окуганыбызга күбө болуп келет.

Орозонун көптөгөн пайдалары бар. Ал бизге – күнөөкөрдү- Кудуреттүү Аллахтын буйруктарынан баш тарттырган бул дүйнөнүн ырахаттары арзыбаган нерсе экендигин сездирет.  Биз бул дүйнө ырахаттары үчүн акыретти сата турган нерсе эмес экенин сезебиз.

Ошондой эле, дүйнөлүк ырахаттардан баш тартуу бизге канчалык алсыз экенибизди түшүнүүгө жардам берет жана биз Аллах Таалага канчалык муктаж экенибизди түшүнгөндөн кийин бизден текебердик жана корстондук сезими жоголот.

Ыйык Куранга келсек, көптөгөн адамдар бул убактылуу дүйнө менен алек болуп, аны арттарына ыргытып койушкан. Алар анын маанилери жөнүндө ойлонушпаган жана өздөрүнүн бактысы анда, ал эми бактысыздыгы андан алыс болууда экенин түшүнүшкөн эмес. Аны окуу менен эмес, аны  турмушка колдонуу менен гана  аларды бул дүйнөдө да, акыретте да куткарылууга жана бакытка жетиштирет.

Бул ыйык ай биз үчүн артыкчылыктарыбызды кайрадан карап чыгууга жана бизди дээрлик жок кылып жиберген суроолорго жооп табууга  үлкөн мүмкүнчүлүк. Эмне үчүн биз Ыйык Куран колубузда турганда бактысызбыз? Орозо кармаган адам өзүнө мунун себеби Ыйык Курандан жана анын өкүмдөрүнөн алыстап, дүйнөгө жана анын азгырыктарына берилип кеткендигинде деп жооп берет.

Биз Аллахтан динибизди сактап калууну жана бул ыйык айда бизге жеңиш, күч-кубат жана жеңилдик тартуулоону суранабыз.

Аллах буйруса, келерки “Асыл хадис менен” берүүбүздөн жолугушканга чейин сиздерди Аллахтын камкордугуна, коргоосуна жана коопсуздугуна калтырабыз. Сиздерге Аллахтын тынчтыгы, ырайымы жана берекеси  болсун.

1447-х, 28-рамазан.

2026-ж, 17-март.