Агар ҳукмдорларимиз бунчалик иккиюзламачилик қилмаганларида, Ҳоманаийнинг ўлдирилиши яна бир Пеарл-Ҳарбор ҳисобланар эди

Агар ҳукмдорларимиз бунчалик иккиюзламачилик қилмаганларида, Ҳоманаийнинг ўлдирилиши яна бир Пеарл-Ҳарбор ҳисобланар эди

Хабар:

2026 йил 1 март куни Эроннинг расмий ахборот воситалари Теҳрондаги ҳокимият объектларига уюштирилган ҳужумлар натижасида Эрон олий раҳбари Оятуллоҳ Али Ҳоманаий ўлдирилганини тасдиқлади. Унинг ўлдирилиши Америка ва яҳудий вужуди томонидан биргаликда олиб борилган ҳужумнинг дастлабки зарбаларидаёқ содир этилди.

Изоҳ:

Ҳоманаийнинг ўлдирилиши Америка бошчилигидаги урушнинг дастлабки босқичида, ҳарбий ҳаракатлар расман эълон қилинмаган ва Америка билан тинчлик музокаралари кетаётган бир пайтда амалга оширилди. Бу раҳбариятни нишонга олган қотиллик операцияси сифатида тавсифланди.

Бир пайтлар Япония олдиндан огоҳлантиришсиз Америка денгиз флотига ҳужум қилганида, Америка: «Кеча, 1941 йил 7 декабрь — тарихда шармандалик доғи бўлиб қоладиган кунда — Америка Қўшма Штатлари Япония империясининг денгиз ва ҳаво кучлари томонидан кутилмаган ва атайлаб уюштирилган ҳужумига учради», дея буни «ваҳший тажовуз»деб атаган эди.

1941 йил 8 декабр куни Американинг ўша пайтдаги президенти Франклин Д. Рузвельт Конгрессдаги нутқида: «Америка Қўшма Штатлари Япония билан тинчлик ҳолатида эди ва ушбу давлатнинг илтимосига биноан Тинч океанида тинчликни сақлаш мақсадида Япония ҳукумати ва императори билан музокаралар ҳали ҳам давом этаётган эди», дея Японияни музокаралар олиб борилаётган пайтда ва олдиндан огоҳлантирмасдан ҳужум қилгани учун очиқчасига айблади.

Пёрл-Харборга қилинган ҳужумдан кейин жамоатчиликнинг норозилиги кучайди. Ушбу ҳужум Америка Қўшма Штатларининг Иккинчи жаҳон урушига киришига олиб келди ва бу 1907 йилги Учинчи Гаага конвенциясининг биринчи: «Ҳарбий ҳаракатларни олдиндан очиқ ва аниқ огоҳлантиришсиз бошлаш мумкин эмас», деган моддасига асосланди.

Кейинчалик Учинчи Гаага конвенцияси янги уруш қоидалари билан алммаштирилди, бироқ ўша янги уруш қоидаларини Американинг ўзи очиқчасига бузиб келмоқда. Америка халқаро миқёсдаги қонунни тан олмайдиган энг йирик террорчи давлатлардан бири ҳисобланади. Бу исломий мамлакатларга нисбатан узоқ вақтдан бери давом этиб келаётган «бўлиб ташлаб, зарба бериш» андозасининг бир қисмидир. У дастлаб бир давлатни изоляция қилади, унга санкциялар жорий қилади, кейин устидан бомбалар ёғдириб, унинг институтларини вайрон қилади, ундан сўнгра навбатдаги давлатга ўтади. Шу билан бирга, ҳар бир кампания алоҳида «ахлоқий фавқулодда ҳолат» сифатида тақдим этилади. Натижада хавфсизлик эмас, балки ҳукмронлик қилишга мослаштирилган минтақавий тизим юзага келади. Бунда суверенитет шартли бўлиб қолади, қаршилик кўрсатиш эса жиноят ҳисобланади.

Бироқ Американинг иккиюзламачилиги араб давлатларининг хорланган иккиюзламачилиги олдида ҳеч нарса бўлмай қолади. Чунки бу давлатлар Эроннинг ўч олиш зарбаларини ўз суверенитетларига қарши қонунбузарлик сифатида шошилинч равишда айблашди. Бу шунчаки қуруқ гап, чунки айнан ўша давлатларнинг ўзлари бошқа давлатларнинг суверенитетини бузиб, вайрон қииладиган АҚШ базаларини ўз ҳудудларида жойлаштириб келишмоқда.

Бирлашган Араб Амирликлари 2026 йил 28 февралда берган расмий баёнотида Эрон томонидан содир этилган «миллий суверенитетнинг очиқдан-очиқ бузилиши ва халқаро ҳуқуқнинг жиддий бузилишини» қоралаб, ўзининг «жавоб қайтариш ҳуқуқига эга эканини» таъкидлади. Шунингдек, Саудия Арабистони ҳам Эроннинг очиқ тажовузини ва Кўрфаздаги бир қатор давлатларнинг суверенитетини қўпол равишда бузганлигини қоралади. Ҳатто Иордания араб давлатларининг бирлиги ҳақида сўз юритди!

Улар атайлаб кўрмаганга олган ҳақиқат шундан иборатки, минтақадаги Америка кучларининг мавжудлиги араб давлатлари ичидаги ҳарбий базаларга, ҳаво йўлакларига, логистика марказларига ва чуқур илдиз отган разведка ҳамкорлигига таянади. Бу ҳукмдорлар ўзларини суверенитет ҳимоячилари сифатида кўрсатиб гапирганларида, бошқаларнинг суверенитетини эътиборга олишни талаб қилади, аммо ўзларининг суверенитетларини эса ўз қўллари билан бошқаларга топшириб қўяди.

Улар Эронни ўз ҳудудларига зарба бергани учун айбламоқдалар, лекин айни пайтда ўзлари ўз ерларини мусулмон давлатларига ҳужум қилаётган кофир кучлар учун фронт чизиғига айлантириб қўйишган! Кўриниб турибдики, орамиздаги мунофиқлар душманларимиз билан тўлиқ тил бириктириб олишган. Уларнинг аҳволи қуйидаги ҳадисда аниқ тасвирланган. Абдуллоҳ ибн Амр розияллоҳу анҳу ривоят қилади: “Расулуллоҳ ﷺ шундай марҳамат қиладилар:

«أَرْبَعٌ مَنْ كُنَّ فِيهِ كَانَ مُنَافِقاً خَالِصاً وَمَنْ كَانَتْ فِيهِ خَلَّةٌ مِنْهُنَّ كَانَتْ فِيهِ خَلَّةٌ مِنْ نِفَاقٍ حَتَّى يَدَعَهَا: إِذَا حَدَّثَ كَذَبَ وَإِذَا عَاهَدَ غَدَرَ وَإِذَا وَعَدَ أَخْلَفَ وَإِذَا خَاصَمَ فَجَرَ».

«Тўртта хислат борки, кимда улар бўлса, у аниқ мунофиқ бўлади. Кимда улардан бири бўлса, то уни тарк этгунча унда мунофиқликнинг бир хислати бўлади:

1. Сўзласа, ёлғон гапиради;
2. Аҳдлашса, аҳдини бузади;

3. Ваъда берса, устидан чиқмайди;

1. Хусуматлашса (тортишса), фожирлик қилади (ҳақоратга ўтади)». (Имом Бухорий ва Имом Муслим ривояти)

Абдуллоҳ Рубин