Американинг Сурия аҳлига қарши макри ва жиноятлари

بِسْمِ اللهِ الرَّحْمٰنِ الرَّحِيمِ

Американинг Сурия аҳлига қарши макри ва жиноятлари

Устоз Муҳаммад Саид Абуд

Сиёсатни кузатиб борадиган ва бу майдонда фаолият юритадиган ҳар қандай киши яхши биладики, Сурия режими лаънати Ҳофиз Асад давридан бошлабоқ Америкага қарам бўлиб қолган эди. Башар Асаднинг отасидан кейин ҳокимиятга келишини ҳам айнан Америка енгиллаштириб берган. Шу даражадаки, ўша пайтдаги АҚШ давлат котиби Мадлен Олбрайт ҳокимиятни Башарга топшириш «томоша»сида шахсан иштирок этганди. Ваҳоланки, дунё етакчиларидан ундан бошқа ҳеч ким келмаган эди. Олбрайт Дамашқда туриб, ҳокимият тинч ва силлиқ ўтганини таъкидлаб, ушбу жараённи ҳамда Башарни қўллаб-қувватлашини очиқ эълон қилган.

Американинг Суриядаги жиноятларига унинг Асад режимини ўз ҳимоясига олгани ҳамда ўтган асрнинг саксонинчи йилларидаги Ҳама воқеаларида мусулмонларни қатағон қилишда унга ёрдам бергани яққол далилдир. Шунингдек, Америка Шом қўзғолонини бостиришда ҳам Башар Асадни қўллаб-қувватлади. Ўша пайтда Америка масъулларининг баёнотлари шунчаки танқидлардан қутилиш ва алдов учун хижолатомуз тарзда айтилган сўзлардан иборат эди. Масалан, Барак Обама «Башар ўз легитимлигини йўқотди ва кетиши керак» деб баёнот берганда, режимга ҳеч қандай сезиларли босим ўтказмади. Аксинча, Шом қўзғолонини буткул йўқ қилиши учун Башарга яширинча маблағ ва вақт тақдим этди. Башар Суриядаги мусулмонларга қарши бир неча марта кимёвий қурол ишлатди. Бу эса унинг жазодан мутлақо қўрқмаслигини кўрсатади. Унга берилган «жазо» эса Трамп томонидан Тифор аэродромининг баъзи учиш йўлакларини бомбалагани каби шунчаки «саҳналаштирилган томоша» шаклида бўлди. Бунга қўшимча, режимга баъзи санкциялар ҳам қўлланилди, бироқ улар режимга ҳеч қандай таъсир кўрсатмади, аксинча, унинг оловида Сурия халқи ёнди. Шу билан бирга, Америка қўзғолонни жиловлаш ва йўқ қилиш учун очиқ душманларимизни ҳам, ўзини дўст қилиб кўрсатган мунофиқларни ҳам бизга қарши сафарбар этди.

Американинг Асад режими жиноятларига қарши очиқдан-очиқ қилган бор ҳаракати мана шулардан иборат бўлди. Аслида эса у Эрон ва унинг жангари гуруҳларига Сурияга кириб, режим тарафида жанг қилиш учун йўл кўрсатиб, Асадни яширинча қўллаб-қувватлади. Кейинчалик, Эрон қўзғолонни бостиришда муваффақият қозона олмаганидан сўнг, Америка режимни сақлаб қолиш ва ҳимоя қилиш учун Россия билан келишиб, аралашиш учун унга йўл очиб берди.

Режим Америка ҳимояси ва назорати остида 14 йил давомида Шом аҳлини қирғин қилиш, қамоққа ташлаш, шаҳар ва қишлоқларни вайрон қилиш ҳамда аҳолини сарсон-саргардон қилишда давом этди. У бу ишлари учун ҳеч қандай реал жазодан қўрқмади. Америка эса кичик этник гуруҳларни исёнга рағбатлантириб, кейин уларни «ҳимоя қилиш» сиёсатини олиб борди. Шунингдек, Сурия инфратузилмасини бомбардимон қилишда исломий юртлар юрагига санчилган яҳудий вужудидан фойдаланди. Бундан ташқари, Сурияга қарши жорий этилган санкциялар режим қулаши билан бекор қилиниши лозим эди, бироқ Америка уларни сақлаб қолди. Чунки у санкциялар орқали Сурия халқини сиёсий, хавфсизлик ва иқтисодий соҳаларда янги маъмурият талабларига бўйсундиришни кўзлади. Америка Сурияда ўз таъсирини ўтказиш ва гегемонлигини мустаҳкамлаш йўлида қўллаётган энг жирканч услублардан бири кичик этник гуруҳлар масаласини ўз иродасини ўтказиш учун восита қилиб олишидир. У Сурияни парчалаш уруғларини экиш ҳамда федерализм ва маъмурий децентрализация (марказлашмаган бошқарув) ўртасидаги «гибрид» бошқарув моделини вужудга келтириш учун ушбу гуруҳларни яширинча (парда ортида) гижгижлашни бошлади. Бундан мақсад мамлакатни доимий фалажлик ва низо ҳолатида ушлаб туришдир. Шу йўл билан Америка ўзининг вакили Том Барак ҳамда Давлат департаменти қошидаги вакиллари ва Конгресс орқали ушбу низони бошқариш ва ҳар бир катта-ю кичик ишга бурнини суқиш имкониятига эга бўлмоқда. Шу билан бирга, мамлакат яхлитлиги ва барқарорлигини қўллаб-қувватлаши ҳақида ёлғондан даъво қилишда давом этмоқда.

Бутун исломий Умматнинг, хусусан Сурия аҳлининг асл душмани Америкадир. Унинг кичик этник гуруҳларни яширинча гижгижлаши ва уларнинг исёнларини очиқчасига ҳимоя қилиши, ваҳоланки, оддийгина кўрсатма билан уларни тинчлантириш ва жамиятга мослаштиришга қодир бўла туриб буни қилмаётгани, шубҳасиз, Американинг нафақат Сурия аҳли, балки бутун дунё халқлари тақдири билан ўйнашаётганини кўрсатиб турибди. У халқлар бошига ўзи хоҳлаган ҳукмдорларни қўймоқда, сўнг Америка манфаатларига хизмат қилиш қобилиятини йўқотганда уларни четлатяпти. Шундай экан, Америкага таяниш – сиёсий жиҳатдан ўз жонига қасд қилиш ҳамда динга қарши энг оғир жиноятлардан биридир.

Американинг Сурияга тажовузи, ўз малайи Башар қўли билан мамлакатни вайрон қилиши ва аҳолининг сарсон-саргардон этилишига қарши ҳақиқий ва зарур чора – Американинг Сурия ва исломий юртлардаги таъсирини таг-туги билан суғуриб ташлаш, унинг гумашталарини ҳайдаб чиқаришдир, шунингдек, у билан ҳамкорлик қилиш, иттифоқ тузиш ёки унинг чизиғига юришдан юртларимизни огоҳлантиришдир. Ҳокимиятни мустаҳкамлаш ва юрт фаровонлиги учун унга суяниш ёки розилигини исташ янтоқдан узум кутаётган кимсанинг ҳолатига ўхшайди!

Сўнгги пайтларда Суриянинг ўтиш даври президенти Аҳмад Шара олиб бораётган сиёсат ва унинг Америка манфаатларига мос баёнотлари ҳақида гап-сўзлар кўпайди. Жумладан, Қатардаги «Давҳа форуми» доирасида CNN телеканалининг халқаро масалалар бўйича бошловчиси Кристиан Аманпурга берган интервьюсида у «терроризм» айбловини ўзидан четлатишга қаттиқ уринди. Ваҳоланки, Американинг «терроризмга қарши кураш» борасида турли режимлар билан тузган келишувлари аслида Ислом ва унинг аҳкомларига қарши курашдан бошқа нарса эмас!

Ҳозирги маъмуриятнинг Америка олдидаги ён беришларига сукут сақлаш, қолаверса, бундай ён босишга йўл очиб бериш Аллоҳнинг шариатига зиддир. Бу эса мамлакатни янада кўпроқ парчаланиш, низо, ҳалокат сари етаклаб, сиёсий, хавфсизлик ва иқтисодий жиҳатдан парокандаликка олиб келади. Бундан ташқари, бу ҳолат қалби ва вужуди билан Исломга душманлик қилаётган ички кучларнинг муқаррар ҳукмронлигига сабаб бўлади. Бу ён беришларни оқлаш, уларни тарғиб қилиш ҳамда уларни асослаш учун адаштирувчи фатволар тўқиш – хатарли сирпаниш ва ҳаммани қамраб оладиган улкан офатдир. Бунинг зарари фақат ҳозирги маъмуриятнинг ўзига эмас, балки Сурия аҳлига ва уларнинг барча қурбонликларига ҳам етади.

Низоларга чек қўядиган, келишмовчиликларни бартараф этадиган ва Америка аралашувининг йўлини тўсадиган ягона тўғри чора – Аллоҳ Субҳанаҳу ва Таолонинг шариатини тўлақонли татбиқ этишдир. Бу ҳақда Аллоҳ Таоло шундай дейди:

وَلَن يَجۡعَلَ ٱللَّهُ لِلۡكَٰفِرِينَ عَلَى ٱلۡمُؤۡمِنِينَ سَبِيلًا

«Аллоҳ ҳаргиз кофирлар учун мўминлар устига йўл бермагай» [Нисо 141]

Чунки Аллоҳнинг шариати ҳар бир ҳақдорга ўз ҳаққини берадиган мукаммал низомдир. Ғайримусулмонлар Исломнинг раҳмати ва адолатини ҳис қилишлари билан нафақат тинчланадилар, балки Аллоҳнинг динига тўп-тўп бўлиб кириб келадилар. Аллоҳнинг шариатини татбиқ этиш учун ҳукмдор Америка ва унга малай бўлган жиноятчи кофирларга суяниш ўрнига, ичкаридаги мусулмонлардан – ваҳоланки улар оз эмас – ҳамда бутун дунёдаги мусулмонлардан ёрдам сўраши лозим. Ана шунда ҳукмдор тарафига миллионлаб мусулмон етиб келади.

Шунингдек, етакчилар Росулуллоҳ ﷺ таъкидлаганидек, жонларини, мол-мулкларини ва ҳокимиятларини фидо қилишга тайёр бўлишлари лозим:

«لَوْ وَضَعُوا الشَّمْسَ فِي يَمِينِي وَالْقَمَرَ فِي شِمَالِي عَلَى أَنْ أَتْرُكَ هَذَا الْأَمْرَ حَتَّى يُظْهِرَهُ اللَّهُ أَوْ أَهْلِكَ فِيهِ مَا تَرَكْتُهُ»

«Агар буни тарк этишим эвазига ўнг қўлимга қуёшни, чап қўлимга ойни қўйсалар ҳам, то Аллоҳ бу ишни ғолиб қилгунча ёки бу йўлда ҳалок бўлгунимча уни асло тарк этмайман».

Бу – динни барқарор қилиш ва оламлар Роббисининг шариатини ҳакам қилишдаги Пайғамбарлик манҳажидир; Бу асло Аллоҳнинг душманларига бўйин эгиш ёки уларга ён бериш эмас. Ваҳоланки, Аллоҳнинг душманлари кечаю кундуз Исломий Умматга қарши макр қилишда давом этмоқда. Аллоҳ Таоло айтади:

لَا يَرۡقُبُونَ فِي مُؤۡمِنٍ إِلّٗا وَلَا ذِمَّةٗۚ وَأُوْلَٰٓئِكَ هُمُ ٱلۡمُعۡتَدُونَ

«Улар бирон мўмин хусусида на аҳдга ва на бурчга боқадилар. Улар тажовузкор кимсалардир» [Тавба 10]

Роя газетасининг 2026 йил 11 феврал, чоршанба кунги 586-сонидан