Сурия президенти АҚШга ташриф буюрди: кеча “террорчи” эди бугун “дўст” бўлди
Сурия президенти АҚШга ташриф буюрди: кеча “террорчи” эди бугун “дўст” бўлди
АҚШ 5 ноябрь куни Суриянинг муваққат президенти Аҳмад ал-Шарага қарши санкцияларни бекор қилиш бўйича резолюция лойиҳасини тайёрлаб, БМТ Хавфсизлик кенгашига тақдим этди. 6 ноябрь куни Хавфсизлик Кенгаши Сурияниннг муваққат президенти ва Сурия ўтиш даври ҳукуматининг ички ишлар вазири Анас Хаттобни санкциялар рўйхатидан чиқариш тўғрисида резолюция қабул қилди. 7 ноябрь куни эса АҚШ Сурия президенти Аҳмад ал-Шарага қарши бир томонлама киргизилган санкцияларни бекор қилди. Шунингдек, Сурия ўтиш даври ҳукуматининг ички ишлар вазири Анас Хаттоб ҳам қора рўйхатдан чиқарилди.
Шу тариқа, санкциялар бекор қилинганидан кейин Аҳмад ал-Шара 9 ноябрь куни расмий ташриф билан АҚШга йўл олди. Ҳозирда Доналд Трампнинг Аҳмад аш-Шара билан учрашуви кутилмоқда. Ушбу учрашув давомида АҚШ Суриянинг янги ҳукуматини ИШИДга қарши кураш олиб борувчи ўзининг коалициясига киритишни умид қилмоқда. Шунингдек, Reuters ва AFP хабарларига кўра, АҚШ Сурия пойтахти Дамашқда ҳарбий база ташкил этишни кўзламоқда.
Ал-Шара Вашингтонга шанба куни кечқурун етиб келди ва ўша вақтнинг ўзида Сурия Ички ишлар вазирлиги ИШИДга қарши “кенг кўламли хавфсизлик амалиёти” бошланганини эълон қилди. Сурия Ички ишлар вазирлигининг маълумотларига кўра, амалиёт Идлиб, Ҳалаб, Хумс ва Ҳама вилоятларида олиб борилмоқда. Амалиёт доирасида 61та рейд ўтказилиб, 71 киши қўлга олинган ва ИШИДнинг бир нечта ячейкалари йўқ қилинди. Вазирликнинг таъкидлашича, бу тадбирлар Сурия ҳукуматининг терроризмга қарши курашни давом эттириш қатъиятини намойиш этади.
Изоҳ:
Кўриниб турибдики, АҚШ Сурия президентига қарши тўсиқларни олиб ташлаш учун барча шароитларни тайёрлаб қўймоқда. Бунга жавобан Сурия ҳукумати мамлакатда ИШИДга қарши кенг кўламли амалиётлар бошлади. ИШИД аъзолари борми ёки йўқми, фарқи йўқ. Муҳими ИШИДга қарши кураш олиб бораётганини кўрсатиш. Бу Америка учун зарурдир. Чунки у ИШИДга қарши кураш баҳонасида ўз сиёсатини олға суриб, таъсирини кенгайтиришга ҳаракат қилмоқда.
Эслатиб ўтамиз, бир неча кун аввал Сурия ҳукумати АҚШ билан биргаликда Сурияда ИШИДга қарши амалиётлар ўтказган эди. Бу ҳолат Сурия режими ва АҚШ ўртасидаги муносабатларни очиқлаш ва бу муносабатларни мусулмонлар олдида “оқлаш” учун баҳонадир. Шундай қилиб, кеча АҚШ “террорчи” деб атаган одам бугун “оппоқ” бўлиб, “террорчилар”га қарши курашувчи дўстга айланди. Бундан кўриниб турибдики, ким “террорчи” эканлигини белгиловчи бирор бир таъриф ёки қоида йўқ. АҚШ истаган кишисини “террорчи” деб эълон қилади ёки уни “террорчи”лар рўйхатидан чиқариб ташлайди. Дунёга ўз ҳукмини ўтказиш ва таъсирини кучайтириш ҳамда ўзи хоҳлаган мамлакатларга бостириб кириш учун “терроризм” тушунчасини ўйлаб топган ҳам АҚШнинг ўзидир. Сурия ҳукуматининг терроризм”га қарши курашда АҚШ билан ҳамкорлик қилиши бу – унинг демократик тизимни қабул қилганидан ва шариатни ўрнатишдан бош тортганидан далолат беради.
Ҳорун Абдулҳак
