Ирандагы согуш күчөп, мөөнөтү узарып барууда
Ирандагы согуш күчөп, мөөнөтү узарып барууда
АКШнын Коргоо министрлиги (Пентагон) Ак үйгө Иранга каршы согушту улантуу үчүн 200 миллиард доллардан ашык каражат бөлүүнү сунуштап, бул өтүнүчтү Конгресске киргизүүнү пландап жатат.
Ак үй азырынча Конгресстен канча каражат сурай турганын так белгилей элек. Акыркы эки жуманын ичинде Коргоо министрлиги бир нече каржылык сунуштарды киргизген. Бул сумма Дональд Трамп администрациясы ушул күнгө чейин жүргүзгөн аба операцияларынын чыгымдарынан да жогору болору күтүлүүдө. Ошол эле учурда, Ак үйдүн айрым жогорку кызматтагы өкүлдөрү Конгресс мындай өтүнүчтү колдошуна күмөн менен карап жатышат. Айрыкча, аскердик жаңжалга каршы чыккан конгрессмендер күчтүү каршылык көрсөтүшү мүмкүн.
Согушка кошумча каражат бөлүүнү сунуштоо менен бирге, Дональд Трамп администрациясы Жакынкы Чыгыштагы операцияларды бекемдөөгө АКШнын бир нече миң аскерин тартуу мүмкүнчүлүгүн карап жатат. Бул тууралуу «Reuters» агенттиги америкалык расмий өкүлдөргө жана булактарга таянып билдирди. Алардын айтымында, мындай кадамдар Иранга каршы аскердик кампаниянын алкагында АКШнын аракеттерин кеңейтүүгө мүмкүнчүлүк берет.
Каралып жаткан варианттардын арасында Ормуз кысыгынан мунай танкерлеринин коопсуз өтүшүн камсыздоо бар. Бул негизинен АКШнын аба күчтөрү жана деңиз флоту аркылуу ишке ашырылат. Бирок, айрым булактардын айтымында, кысыкты толук коопсуз абалга келтирүү үчүн Иран аймагынын жээктерине АКШ аскерлерин жайгаштыруу зарыл болушу мүмкүн. Ошондой эле, АКШ администрациясы Ирандагы Харк аралына аскерлерди жөнөтүү мүмкүнчүлүгүн да талкуулап жатат. Бул арал Иран мунай экспортунун болжол менен 90 пайызы өтүүчү негизги борбор болуп эсептелет.
