Қирғизистонда санкция хавфи юқори бўлган компанияларга нисбатан қатъий чоралар кўрилмоқда
Қирғизистонда санкция хавфи юқори бўлган компанияларга нисбатан қатъий чоралар кўрилмоқда
Қирғизистонда санкция ва комплаенс хавфлари юқори деб топилган 35га яқин юридик шахслар (МЧЖ, фонд, корхона, муассаса каби ташкилот ёки компания) фаолиятини мажбурий тартибда тугатиш жараёни бошлаб юборилди. Бу ҳақда Иқтисодиёт ва тижорат вазирлиги маълум қилди.
Вазирлик тақдим этган маълумотларга кўра, аниқланган мазкур компанияларнинг фаолиятида халқаро санкция чекловларини четлаб ўтишга ўхшаш операциялар белгилари мавжуд бўлиши мумкин. Шу сабабли Иқтисодиёт ва тижорат вазирлиги мазкур юридик шахсларнинг фаолиятини мажбурий тарзда тугатишни бошлаш бўйича Адлия вазирлигига расмий мурожаат юборган.
Бу — давлат томонидан бундай компанияларга нисбатан кўрилаётган илк чора эмас. Жорий йилнинг Июл ойи охирида учта компаниянинг фаолияти тўхтатилгани хабар қилинган эди. Шунингдек, криптовалюта билан шуғулланувчи компаниялардан бирининг ҳам лицензияси қайтариб олинган.
Август ойида эса идоралараро ишчи гуруҳ 40тага яқин текширувдан ўтказилган компаниядан 19 тасининг фаолиятини тугатиш лозим деган қарорга келди. Бундан ташқари, 2 октябрь куни 16та компанияни ёпиш масаласини ҳал қилиш учун уларга тегишли материаллар суд органларига оширилган.
Айни пайтда, давлат банклари ҳам комплаенс-назоратни кучайтирмоқда. 2-октябрга келиб, «Элдик Банк» тахминан 126та компаниянинг, «АБанк» эса 100га яқин компаниянинг ҳисобварақларини ёпди.
Иқтисодиёт вазирлигининг қайд этишича, амалга оширилаётган бу каби чора-тадбирлар иккиламчи санкциялар қўлланилиши хавфини камайтиришга ҳамда Қирғизистоннинг банк ва ташқи иқтисодий тизимини халқаро чекловларни четлаб ўтиш мақсадида суиистеъмол қилинишининг олдини олишга қаратилган.
