Фаластин масаласи ва Франция ҳукуматига қарши танқидлар
Фаластин масаласи ва Франция ҳукуматига қарши танқидлар
2026 йил октябрь ойининг бошларида Франция пойтахти Парижда ва бошқа шаҳарларида сўнгги ўн йилликлардаги энг йирик ўқувчи-талабалар норозилик намойишлари авж олди. Расмий манбаларга кўра, бунга таълим соҳасидаги муаммолар, яъни синфларнинг ҳаддан ташқари тўлиб тошгани ҳамда ўқитувчилар етишмовчилиги ва лицейларнинг етарлича молиялаштирилмагани сабаб бўлган. Бироқ бу ҳаракат доирасида сиёсий талаблар ва Фаластинни қўллаб-қувватловчи кун тартиби ҳам яққол сезилади (CNN).
Мамлакатда норозилик намойишлари ва полиция билан тўқнашувлар ҳамон давом этмоқда. Бутун Франция бўйлаб ўтказилаётган намойишларда юз минглаб инсонлар иштирок этмоқда. Франция Ички ишлар вазирлиги тарқатган маълумотларга кўра, норозилик ҳаракати бошлангандан буён 6 мингдан ортиқ киши ҳибсга олинган. Айрим лицейларга ўт қўйилган ёки вайрон қилинган. Париж ва бошқа шаҳарларда полиция намойишчиларни тарқатиб юбориш учун кўздан ёш оқизувчи газ қўллаган ҳолатлар қайд этилмоқда (Reuters).
Талабалар фаоллари университет кампусларининг кириш жойларини тўсиб қўйиб, ўқиш шароитларини яхшилаш талаблари билан бирга, Фаластин ва Ғазо сектори халқи билан бирдам эканликларини билдирмоқдалар. Акциялар чоғида Фаластин байроқлари ҳам баланд кўтарилмоқда (The New Arab).
Норозилик намойишларига чиққанлар ва уларни қўллаб-қувватлаётган сўлчи сиёсий кучлар, хусусан, «Бўйсунмас Франция» (La France insoumise, LFI) партияси президент Эмманюэль Макрон ҳамда унинг ҳукуматини кескин танқид остига олмоқда. Шунигдек, Француз расмийларини «Ғазо секторидаги геноцидга шерик бўлаётганлик»да ва фаластинликларни ҳимоя қилишга ожизлик қилаётганликда ҳамда Яқин Шарқда муваффақиятсиз ташқи сиёсат юритаётганликда айбламоқда (Anadolu).
7 октябрь воқеаларининг уч йиллигига тўғри келган ушбу ҳафталарда, кескинлик янада кучайди. Фаластинни қўллаб-қувватловчи ҳаракат вакиллари ҳукуматнинг намойишларга тақиқ қўйиш ҳақидаги қарори устидан судга шикоят ёзиб, буни «сиёсий цензура» деб атадилар. Франция маъмурий суди фаоллар фойдасига қарор чиқариб, намойишларга қўйилган тақиқни бекор қилди. Суд Ғазодаги ҳарбий ҳаракатларга қарши ўтказиладиган намойишлар жамоат тартибига хавф туғдирмайди, деган хулосага келди ва натижада режалаштирилган юриш бўлиб ўтди (TRT World).
