Түркия уйгур мусулмандарынын маселесин экономикалык кызыкчылыктарга айырбаштоодо

Түркия уйгур мусулмандарынын маселесин экономикалык кызыкчылыктарга айырбаштоодо

“BBC Monitoring”дин талдоосуна ылайык, Анкара Пекин менен кызматташуусу тереңдеген сайын Чыгыш Түркстандагы уйгур мусулмандар маселесин сейрек көтөрүүдө. Расмий сөздөр акырындык менен өзгөрдү. 2009-жылы Режеп Тайип Эрдоган Чыгыш Түркстандагы окуяларды «дээрлик геноцид» деп мүнөздөгөн болсо, бүгүнкү күндө бул тема негизинен БУУнун жыйындарында же эки тараптуу сүйлөшүүлөрдүн алкагында гана кыскача айтылууда. BBCнин маалыматына караганда, түрк медиасында уйгур мусулмандары тууралуу материалдардын саны кескин азайган. Бир катар маалымат каражаттарында 2014-жылы уйгур мусулмандарынын азап-кыйынчылыктары тууралуу ондогон макалалар жарыяланган болсо, 2022–2023-жылдары бул көрсөткүч нөлгө түшкөн.

Эксперттер мындай өзгөрүүнү Түркия менен Кытайдын экономикалык кызматташтыгынын өсүшү менен түшүндүрүшөт. 2024-жылы эки өлкөнүн соода жүгүртүүсү дээрлик 50 млрд долларга жетип, Кытай Түркиянын эң ири товар жеткирүүчүсүнө айланды. Ири долбоорлордун катарында Alibaba компаниясынын Trendyol’го салган инвестициялары, Маниса шаарында 1 млрд долларга бааланган BYD автоунаа заводунун курулушу, ошондой эле жаңы атомдук электр станциясы боюнча сүйлөшүүлөр бар. Ошондой эле, «Ортоңку коридорду» «Бир алкак — бир жол» долбооруна кошуу пландары бар.