Трамп “Тинчлик Кенгаши” ташкил этилганини эълон қилди
Трамп “Тинчлик Кенгаши” ташкил этилганини эълон қилди
АҚШ президенти Доналд Трамп Давосдаги Жаҳон иқтисодий форумида “Тинчлик Кенгаши” номли янги ташкилот ташкил этилганини расман эълон қилди ва бошқа давлатларни ушбу ташаббусга қўшилишга чақирди.
Оқ уй матбуот котиби Кэролайн Ливиттнинг сўзларига кўра, Трамп 22 январ куни ташкилотнинг таъсис ҳужжатини имзолаган. «Низом расман кучга кирди ва Тинчлик Кенгаши халқаро ташкилот сифатида ташкил этилди», деди у. Баъзи танқидчилар бу янги ташкилот Бирлашган Миллатлар Ташкилотининг обрўсига путур етказиши мумкин, деб ҳисоблашмоқда.
Трамп форумда сўзлаган нутқида “Тинчлик Кенгаши” шуғулланадиган асосий ташқи сиёий йўналишларни баён қилар экан, Яқин Шарқдаги вазиятга алоҳида эътибор қаратди. Ғазо секторидаги можарони ҳал қилишга кўмаклашиш асосий устувор масалалардан бири сифатида тилга олинди.
АҚШ президенти ўнлаб дунё етакчиларини янги ташкилотга қўшилишга таклиф қилди ва келажакда унинг энг муҳим халқаро институтлардан бирига айланиш салоҳиятига эгалигини таъкидлади. Ушбу “Тинчлик Кенгаши” ташкилотига Доналд Трампнинг ўзи раҳбарлик қилади.
Келишув шартларига кўра, 1 миллиард доллар миқдорида ҳисса қўшган давлатлар кенгашнинг доимий аъзоси бўлиш ҳуқуқига эга бўлади, бошқа давлатлар эса чекланган муддатга қўшилишлари мумкин. АҚШнинг Ғарбдаги аксарият иттифоқчилари бу ташаббусни қўллаб-қувватламади. Европа Иттифоқидан фақат Венгрия иштирок этишга рози бўлди. Трампнинг таклифини қабул қилган давлатлар қаторига Албания, Аргентина, Беларусия, Миср, Исроил, Марокаш, Покистон, Қатар, Саудия Арабистони, Туркия, Бирлашган Араб Амирликлари ва Ветнам давлатлари кирди.
