Трамп дунёга ва мусулмонларга нимани тақдим этмоқчи?
Трамп дунёга ва мусулмонларга нимани тақдим этмоқчи?
Эпштейн файлларида ҳужжатлаштирилган айбловлар ва шов-шувли можаролар фош этилганидан кейин ҳам, Трамп ўзининг такаббурлиги ва манмансирашини тўхтатмаяпти. Бу унинг табиатининг ажралмас қисмидир. У Эронга ҳужум қилиб, унинг ички ишларига аралашмоқда ва бунга Эрон режимининг ўз халқига муносабатини баҳона қилмоқда. Буларнинг барчаси минтақада, айниқса Ливанда унинг қўлларини кесиш режалари билан бирга амалга оширилмоқда. Мақсад Эроннинг Америкага қарамлигини кучайтириш ва минтақани ўзининг ва эркатой боқимандаси бўлган яҳудий вужудининг иродасига бўйсундиришдир. Шу тарзда, минтақада кучга ёки таъсирга эга бўлган ҳеч ким қолмаслиги керак, хоҳ у қарамлик тарафдори бўлсин, хоҳ ўз қарорларида мустақилликка интилсин.
Трамп ўзига қарам бўлишни афзал кўрганларга буйруқ бериш ролини ижро этмоқда. Улар ўз мамлакатларини Американинг режалари учун шунчаки инвестиция материалига айлантириб беришди. Натижада, у хоҳлаганидек божхона тўловларини жорий қилиб, мамлакатларнинг бойликларини мунтазам равишда талон-торож қилмоқда. Трампнинг дунёга ва Ислом умматига тақдим этмоқчи бўлган нарсаси — такаббурона кучини кўрсатиш орқали умматнинг иродасини синдириш ва умматнинг ўз ҳаққини қайтариб олиш ёки ўзига зулм қилганларни жазолаш ҳақида ўйлашига ҳам йўл қўймасликдир.
Ғазодаги икки ярим йилга чўзилган шафқатсиз қирғин давомида ушбу халқаро кучларнинг оммавий ахборот воситалари қирғинларни атайлаб ҳужжатлаштириб, унинг даҳшатли манзараларини экранларда намойиш этди. Бу тизимли равишда эълон қилиш қурбонлар манфаати учун эмас, балки Исломий ўлкалар ва Ғарбдаги жамиятларни итоаткорликка ҳамда хорликка бўйин эгишга тайёрлаш мақсадини кўзлади. Халқларни бу ҳукмронликка кўниктириб, уни қочиб қутулиб бўлмайдиган муқаррар тақдир сифатида қабул қилдириш орқали, одамларни ўз ишига эгалик қила олмайдиган подаларга айлантириш кўзланди.
Бироқ, буюк бир ҳақиқатни унутмаслик керакки, Трамп ва унга ўхшаган одамлар бундай ахмоқона чиқишлари билан, инсоний қадриятларни очиқчасига оёқ ости қила олишлари ҳамда дунё халқлари ва Ислом умматига бемалол зулм ўтказа олишлари – фақатгина халқаро майдонда Исломнинг кучли давлати йўқлиги сабабли мумкин бўлди. Бу давлат, шубҳасиз, мустаҳкам иймон, сабр ва матонат билан фаолият қилиш орқали яна қайта тикланади ва Умматнинг бирлиги орқали дунёда ҳукмрон кучга айланади. Ислом Умматининг қайтадан дунё етакчилигини қўлга киритиши Аллоҳнинг Ўз дини учун курашганларга берган ваъдаси ва Расулуллоҳ ﷺнинг хушхабари билан муқаррар амалга ошади. Исломга шарафдан бошқа ҳеч қандай мақом лойиқ эмас, у фақат ўз чегараларида мустаҳкам турган ва Аллоҳдан ёрдам ва мадад кутган халқи билан мустаҳкам оёқда туради.
Аллоҳ Таоло айтади:
وَقَدْ مَكَرُوا مَكْرَهُمْ وَعِندَ اللَّهِ مَكْرُهُمْ وَإِن كَانَ مَكْرُهُمْ لِتَزُولَ مِنْهُ الْجِبَالُ * فَلَا تَحْسَبَنَّ اللَّهَ مُخْلِفَ وَعْدِهِ رُسُلَهُ إِنَّ اللَّهَ عَزِيزٌ ذُو انتِقَامٍ
“Дарҳақиқат, улар (яъни Макка мушриклари) ўзларининг макр-ҳийлаларини қилдилар. (Лекин) агар уларнинг макрлари сабабли тоғлар емирилиб кетадиган бўлса-да, уларнинг (бу) макр-ҳийлалари Аллоҳ ҳузурида (маълумдир). (Эй Муҳаммад), сиз ҳаргиз Аллоҳни ўз пайғамбарларига берган («Биз албатта пайғамбарларимизни ғолиб қилурмиз», деган) ваъдасига хилоф қилувчи, деб ўйламанг. Албатта, Аллоҳ ғолибдир ва интиқом олгувчидир”. (Иброҳим: 46-47)
