АҚШ-Эрон уруши мамлакат тарихида энг кам қўллаб-қувватланган уруш бўлди
АҚШ-Эрон уруши мамлакат тарихида энг кам қўллаб-қувватланган уруш бўлди
АҚШ тарихида илк бор президент кенг жамоатчилик дастагига эга бўлмай туриб, мамлакатни йирик қуролли можарога тортди. Президент Дональд Трамп маъмурияти томонидан 2026 йил 28 февралда Исроил билан ҳамкорликда Эронга қарши бошланган ҳарбий ҳаракатлар Америка халқи ўртасида тарихдаги энг кўп норозиликларга сабаб бўлган уруш сифатида муҳрланди.
CNN ва SSRS томонидан ўтказилган сўровномаларга кўра, америкаликларнинг фақатгина 41 фоизи Эронга берилаётган зарбаларни қўллаб-қувватлаган, 59 фоизи эса бунга қарши бўлган. Қарши бўлганларнинг 31 фоизи ҳарбий операцияни кескин қоралашини билдирган.
The New York Times нашрининг таҳлилига кўра, ушбу урушнинг дастлабки босқичидаги халқнинг қўллов даражаси сўнгги 90 йил ичида АҚШ олиб борган барча йирик ҳарбий кампаниялар орасида энг паст даражаси бўлди.
NYT маълумотларига кўра, можаронинг дастлабки кунларида операцияни маъқуллаганлар сони атиги 27 фоизидан 41 фоизигача бўлган. Қиёслаш учун айтадиган бўлсак: 2003 йилда АҚШнинг Ироққа қарши урушини америкаликларнинг 76 фоизи қўллаган. 2001 йилда Афғонистонга қарши урушини 92 фоизи қўллаган. Иккинчи жаҳон урушида АҚШнинг иштирокини аҳолининг 97 фоизи маъқуллаган. Қўшимча сўровлар шуни кўрсатдики, АҚШ аҳолисининг 55 фоизи Эронга зарбалар бошлангунга қадар Эрон АҚШга нисбатан тўғридан-тўғри хавф туғдирмаган, деб ҳисоблайди.
NYT таҳлилида таъкидланишича, АҚШ иштирок этган кўплаб урушлар вақт ўтиши билан халқ қўлловини йўқотиб борган. Бироқ уларнинг аксарияти аввалбошда америкаликлар томонидан кенг қўллаб-қувватланган. Эронга қарши ҳарбий операция эса бошланғич босқичида ҳам жамоатчилик тарафидан қўллаб-қувватланмади. Шу жиҳатдан у АҚШ иштирок этган бошқа низолардан тубдан фарқ қилади.
АҚШ тарихидаги аксарият қуролли можароларда фуқаролар президентнинг уруш бошлаш ҳақидаги қарорини дастлаб ёқлашган. Уларнинг фикри фақат уруш чўзилиб, талофатлар сони орта бошлагандагина ўзгара бошлаган. Бундай ҳолатларда америкаликларнинг тезкор ғалабага ишончи йўқолиб, ўз норозиликларини билдира бошлайди. Аммо ҳозирги вазиятда, NYT журналистларининг тахминига кўра, америкаликларнинг норозиликлари уруш бошланишидаёқ кўрина бошлаган. Чунки бўлаётган воқеалар мазкур низо яқин орада тугамаслигидан далолат бермоқда.
