Францияда НАТОдан чиқиш таклиф қилинмоқда
Францияда НАТОдан чиқиш таклиф қилинмоқда
Франция Миллий Ассамблеяси вице-спикери Клеменс Гете Францияни НАТОдан чиқариш ташаббуси билан чиқди. У Х ижтимоий тармоғидаги саҳифасида ушбу масала бўйича резолюцияни кўриб чиқиш учун парламентнинг қуйи палатасига тақдим этиш ниятида эканлигини маълум қилди.
«Бугунги кунда Франциянинг АҚШ бошчилигидаги ва унинг манфаатларига хизмат қиладиган ҳарбий иттифоқдаги иштироки ҳар қачонгидан ҳам кескинроқдир. Мен Франциянинг Шимолий Атлантика алянсидан ва энг аввало Қўшма Ҳарбий Қўмондонликдан чиқишга чақирувчи резолюцияни кўриб чиқишни таклиф қиламан», деб ёзди Гете.
Гете ўзининг ушбу позициясига Вашингтоннинг сўнгги ташқи сиёсий қадамлари таъсир кўрсатганини таъкидлади. Хусусан, у Венесуэла президенти Николас Мадуронинг АҚШ ҳарбийлари томонидан ўғирлаб кетилиши, АҚШнинг «Фаластин қирғини»ни ҳарбий қўллаб-қувватлаши, шунингдек, АҚШ президенти Доналд Трампнинг Гренландияни қурол ишлатиш йўли билан аннексия қилиш эҳтимолини ўз ичига олган таҳдидлари ҳақида айтиб ўтди.
Эслатиб ўтамиз, Франция НАТОга асос солган давлатлардан биридир. У 1949 йилда иттифоқ ташкил этилганидан буён унга аъзо бўлган ва Европа хавфсизлигида муҳим рол ўйнаб келган.
1966 йилда Президент Шарл де Голл Францияни НАТОнинг бирлашган ҳарбий қўмондонлигидан чиқарди. Бу қарор мамлакатнинг ҳарбий ва сиёсий суверенитетини сақлаб қолишга қаратилган эди. Ўша пайтда Франция НАТОдан тўлиқ чиқмади, фақат ўз армиясини мустақил бошқаришга ўтди.
2009 йилда Президент Николас Саркози даврида Франция НАТОнинг бирлашган ҳарбий тузилмасига қайта қўшилди. Бугунги кунда Франция иттифоқнинг энг нуфузли аъзоларидан бири ҳисобланади.
Айни пайтда, Париж АҚШнинг НАТОдаги ҳукмронлигини танқид қилади ва Европанинг стратегик автономиясини қўллаб-қувватлайди. Бу эса Франциянинг НАТОдаги ўрнини иттифоқ ва мустақилликни бирлаштирган алоҳида позиция сифатида намоён қилади.
