Тадбиркорлар устидан назорат кучайтирилади
Тадбиркорлар устидан назорат кучайтирилади
Вазирлар Маҳкамаси томонидан илгари сурилган солиқ тизимини ислоҳ қилиш лойиҳаси жамоатчилик муҳокамасига қўйилди. Мазкур ҳужжат бизнес устидан назоратни кучайтириш, рақамли технологияларни кенг жорий этиш ва солиқ идораларининг ваколатларини кенгайтиришни кўзда тутади.
Таклифлар ичида энг кўп баҳс-мунозарага сабаб бўлаётгани — тадбиркорларни видеокузатув тизимларини солиқ органларига тақдим этишга мажбурлашдир. Борди-ю, корхонада камералар мавжуд бўлмаса, текширувчилар уларни ўзлари ўрнатишади ва олинган тасвирлардан текширув жараёнида далил сифатида фойдаланилади.
Бундан ташқари, рейд тадбирлари ҳам кучайтирилади. Солиқ ходимлари корхонадаги ишчиларнинг ҳақиқий сонини аниқлаш, солиқ ва суғурта тўловларининг ўз вақтида тўланишини, назорат-касса аппаратларидан фойдаланилишини, рақамли тўловлар ҳамда лицензиялар мавжудлигини текшириш ҳуқуқига эга бўладилар. Айниқса, такси хизматлари, етказиб бериш (курьерлик) тармоқлари ва турли рақамли платформалар орқали фаолият юритадиган сервисларга алоҳида эътибор қаратилади.
Ислоҳотлар шиддати бозорлар ва савдо марказларини ҳам ўз ичига олади. Уларнинг зиммасига ижарачиларнинг солиқ интизомига риоя этишини назорат қилиш ва тегишли маълумотларни давлат идораларига тақдим этиб бориш мажбурияти юкланиши мумкин.
Ҳукуматнинг таъкидлашича, бу ўзгаришлардан кўзланган асосий мақсад — «хуфиёна иқтисодиёт»га барҳам бериш, шаффофликни таъминлаш ва солиқ хизматини соддалаштиришдир. Бироқ соҳа мутахассислари бундай кескин чоралар бизнес муҳитига ортиқча босим ўтказиши ва тадбиркорлар орасида жиддий норозиликларни келтириб чиқариши мумкинлигидан хавотирдалар.
