Инвесторларга давлат ерларини аукционсиз бериш таклиф қилинмоқда
Инвесторларга давлат ерларини аукционсиз бериш таклиф қилинмоқда
Қирғизистонда Жўғорку Кенешнинг тегишли қўмитаси инвестиция лойиҳалари учун давлат ва муниципал ер майдонларини ажратишнинг янги тартибини назарда тутувчи қонун лойиҳасини биринчи ўқишдаёқ маъқуллади.
Қонун лойиҳасида инвесторларга ерларни аукцион ўтказмасдан, тўғридан-тўғри инвестиция шартномаси асосида бериш кўзда тутилган. Ердан фойдаланишнинг дастлабки муддати 10 йилгача белгиланган бўлиб, кейинчалик яна узайтирилиши мумкин. Умумий муддат эса 50 йилгача етади.
Энергетика лойиҳалари учун ер майдонларини 49 йилгача муддатга дарҳол бериш таклиф қилинди. Бироқ депутатлар бунга қарши чиқиб, дастлабки муддатни 25 йил этиб белгилашни ва зарур ҳолларда уни кейинчалик узайтиришни тавсия қилишди. Қонун лойиҳасининг муаллифлари депутатларнинг мазкур таклифини инобатга олишларини билдиришди.
