Кыргызстанда санкциялык тобокелдиктеги компанияларга карата чара көрүлүүдө

Кыргызстанда санкциялык тобокелдиктеги компанияларга карата чара көрүлүүдө

Кыргызстанда ишмердүүлүгү санкциялык жана комплаенс тобокелдиктери жогору деп бааланган 35ке жакын юридикалык тарапты мажбурлап жоюу жол-жобосу башталды. Бул тууралуу Экономика жана коммерция министрлиги билдирди.

Министрликтин маалыматына ылайык, аныкталган компаниялардын ишмердүүлүгүндө эл аралык санкциялык чектөөлөрдү кыйгап өтүүгө окшогон операциялардын белгилери болушу мүмкүн. Ушуга байланыштуу Экономика жана коммерция министрлиги Юстиция министрлигине аталган юридикалык тараптарды мажбурлап жоюу жол-жобосун баштоо боюнча кайрылуу жөнөткөн.

Бул бийлик тарабынан компанияларга карата көрүлүп жаткан алгачкы чара эмес. Июль айынын аягында үч юридикалык тараптын ишмердүүлүгү токтотулганы маалымдалган. Ошондой эле криптовалюталык компаниялардын биринин лицензиясы кайтарылып алынган.

Август айында ведомстволор аралык жумушчу топ текшерилген 40ка жакын компаниянын ичинен дагы 19ун жоюу зарыл деген чечим кабыл алган. Мындан тышкары, 2-октябрда 16 компания боюнча материалдар аларды жоюу маселесин кароо үчүн сот органдарына өткөрүлүп берилген.

Муну менен катар мамлекеттик банктар комплаенс-көзөмөлдү күчөтүүдө. 2-октябрга карата «Элдик Банк» болжол менен 126 компаниянын, ал эми «АБанк» 100гө жакын компаниянын эсептерин жапкан.

Экономика министрлигинен белгилешкендей, көрүлүп жаткан чаралар экинчи даражадагы санкциялардын колдонулуу тобокелдигин азайтууга жана Кыргызстандын банктык жана тышкы экономикалык системасын эл аралык чектөөлөрдү кыйгап өтүү үчүн пайдаланууга жол бербөөгө багытталган.