Имам балдардан балмуздактардын кагазын сатып алды
Имам балдардан балмуздактардын кагазын сатып алды
Сосновка айылында жергиликтүү имам майрамдык иш-чаралардан кийин өзгөчө акция уюштурду. Ал балдардан балмуздактын кагазын 3 сомдон сатып алган. Бул акциянын видеосун жергиликтүү мектеп жарыялаган.
Видеодогу кадрлардан ондогон балдар чогултулган кагаздарды имамга алып келип жатканын көрүүгө болот. Уюштуруучулардын айтымында, демилгенин максаты балдарга айлана-чөйрөгө аяр мамиле кылуунун үлгүсүн көрсөтүү, тазалыкты сүйүүгө тарбиялоо жана таштанды таштоо адатынан арылтуу болгон.
Бул акция социалдык тармактарда кызуу талкууну жаратты. Айрым колдонуучулар имамды чыныгы мусулмандын үлгүсү деп атап, жаш муунду өзүнүн жакшы өрнөгү аркылуу тарбиялоого болгон умтулуусун белгилешти. Башкалары болсо, балдарды тазалыкка үйрөтүп жатып, аларды жалаң гана акчалай сыйлык үчүн көндүрбөө керек деген пикирин билдирип, тазалыкты сактоо материалдык түрткүсүз эле ишке ашууга тийиш экенин белгилешти.
Тандалып алынган сыйлоо ыкмасынын тегерегиндеги талаш-тартыштарга карабастан, мындай демилгенин өзүн маанилүү көрсөткүч катары баалоо керек. Бул Ислам дини тазалык, коомдук жоопкерчилик жана жаштарды тарбиялоо маселелерине өзгөчө маани берерин тастыктайт. Ислам тазалыкка өзгөчө көңүл бурат жана бул нерсе Пайгамбарыбыз Мухаммаддын (с.а.в.): «Тазалык ыймандын жарымы», – деген белгилүү хадисинде чагылдырылган. Дал ушул себептен улам, көпчүлүк адамдар имамдын бул аракетинен жөн гана айлананы тазалоого болгон үгүттү эмес, жаш муунга тазалык адеп-ахлактык баалуулуктардын бири экенин эскертүүнү көрө алышты.
