Ҳукумат халқни дабдабали томошалар билан чалғитмоқда
Ҳукумат халқни дабдабали томошалар билан чалғитмоқда
Қирғизистоннинг Талас шаҳрида 11–12 сентябрь кунлари Қирғизистон Республикаси Мустақиллигининг 35 йиллиги расмий равишда нишонланмоқда. Ушбу байрамга бир қатор жаҳон юлдузлари таклиф этилиб, халқнинг маблағлари исроф қилинмоқда ва чет эллик артистларнинг концертларига сочиб юборилмоқда. Бундан олдин ҳам Қирғизистон ҳукумати “Кўчманчилар ўйинлари”ни ташкил этиб, унга ҳам хорижий юлдузлар жалб қилинган ва миллатчилик шиорлари остида миллонлаб долларларни совурган эди. Расмий ҳукумат бу каби дабдабаларни ҳозирча тўхтатиш ниятида эмас кўринади. Чунки президент Администрацияси ишлар бошқарувчисининг раҳбари октябрь ойида “Бишкек Арена”нинг расмий очилиш маросимида ҳам жаҳон юлдузлари иштирок этишини эълон қилди.
Авваламбор бундай тадбирлар учун келаётган хорижий артистлар миллионлаб долларлик гонорар олишини, бу маблағлар охир-оқибат оддий халқнинг чўнтагидан тўланишини унутмаслик лозим. Айниқса, аҳолининг харид қобилияти пасайиб, кундалик турмушда зарур бўлган озиқ-овқат маҳсулотлари кескин қимматлашиб бораётган бир пайтда бу жуда муҳимдир. Бошқача айтганда, бир йил олдин минг сомга сотиб олинган озиқ-овқат саватчасини бугун ўша нархга олиб бўлмайди. Айни пайтда уй-жой ва ижара ҳақлари ҳам тинимсиз ошиб бормоқда. Нархларнинг ўртача йиллик ўсиши 25–30 фоизга етди. Бу қимматчиликлар қаршисида ойлик маош ва пенсияларнинг оширилиши қумга синган томчидек таъсир қилмоқда. Ёқилғи маҳсулотлари нархининг кескин кўтарилиши ҳам дард устига чипқон бўлди. Чунки мамлакат ёқилғини деярли тўлиқ четдан сотиб олади. Шунингдек, юртимизда истеъмол қилинадиган товарларнинг 70 фоизга яқини ташқаридан олиб келинади. Бу эса халқаро бозорлардаги нархларнинг ўзгариши маҳаллий нархларга тўғридан-тўғри таъсир кўрсатишини англатади.
Бундан ҳам муҳими, ушбу дабдабали тадбирлар январда ўтадиган президентлик сайлови арафасида ўтказилаётганини эътибордан четда қолдирмаслик керак. Чунки бундай оммавий тадбирлар орқали амалдаги президентга билвосита тарғибот олиб борилиб, рақибларини қоралаш учун қулай майдон вужудга келтирилмоқда.
Демак, ҳукумат халқ маблағларини чет эллик артистларга совуриш орқали сайлов олдидан халқнинг, хусусан, шу пайтгача сайловларда қатнашмай келган ёшларнинг қўллаб-қувватловига эришишни мақсад қилмоқда.
Аслида эса халқ мулкини ҳаромга сарфлаш шариатда қатъиян ман этилган. Айниқса, оддий аҳоли кундалик турмушини оғир кечираётган пайтда бундай исрофгарчиликка йўл қўйиш мутлақо жоиз эмас. Шунинг учун, қирғиз жамияти халқ мулкининг бундай дабдабали томошаларга сарфланишига кескин қарши туриши шарт! Бундай ёмонликнинг олдини олиш ҳар бир мусулмоннинг бурчидир!
Нурдин Асаналиев
