Халқ мулкини талон-торож қилган кимсани оқлашга уриниш
Халқ мулкини талон-торож қилган кимсани оқлашга уриниш
Қирғизистон президенти Садир Жапаров нашрлардан бирига берган интервьюсида Алексей Ширшовнинг давлатга кўрсатган молиявий ёрдами ва энергетика лойиҳаларида иштирок этгани ҳақида гапириб ўтди.
Президентнинг баёнотига кўра, Ширшов ва унинг шериклари энергетика инфратузилмасини янгилашда иштирок этиб, 715,5 миллион сомлик ишларни бажаришган. Шунингдек, Давлат ипотека компаниясига 100 миллион долларни ўн йилга, фоизсиз қарз сифатида беришган. Бу маблағнинг ярми мамлакат жанубига, ярми эса шимолига уй-жой қуришга йўналтирилиши кўзда тутилган.
Изоҳ:
Бундан аввал ҳам Садир Жапаров жойларда ташкил этилган учрашувларнинг бирида Ширшов ҳақидаги саволга жавоб бераётиб, уни оқлашга уринган эди. Бу ўз навбатида одамлар ўртасида салбий муносабатлар билдирилишига йўл очди. Чунки Ширшов куч билан қулатилган аввалги икки президент даврида энергетика соҳасидаги коррупциявий схемалари билан танилган. Халқ уни ўша даврдаги коррупцияга ботган ҳокимият рамзи сифатида кўради. Шунинг учун ҳам давлат мулкини талон-торож қилган бундай шахсларнинг қамалмаслиги, аксинча, мамлакат раҳбари билан ҳамкорлик қилиб, эркин юриши халқнинг ҳукуматга нисбатан норозилигини кучайтириши шубҳасиз. Зеро, у бугунги энергетика тармоғининг ботқоққа ботишига бевосита алоқадор кишилардан бири ҳисобланади.
Энергетика соҳаси шундай еб-тўймас талончилар, ўғрилар ва порахўр амалдорлар учун бойлик орттириш масканига айланиб қолган. Уларнинг касрига бу тармоқ ботқоқдан чиқолмаяпти. Бу кризиснинг «тўловини» эса оддий халқ тўламоқда. Чунки энергетика соҳаси учун олинган кредитлар халқнинг чўнтагидан қопланяпти. Натижада қишнинг қаҳратон совуғида одамлар электр энергиясининг 5 киловаттлик чекланишига ва тинимсиз электр энергияси ўчирилишларга дучор бўлмоқда.
Бу ҳолат капитализмнинг шафқатсиз, адолатсиз табиатини яққол кўрсатиб турибди. Халқнинг улкан бойлигини талон-тарож қилиб, унинг жуда оз қисмини қайтарганлар оқланмоқда, айни пайтда арзимаган икки минг сом учун оддий фуқаролар қамалиб кетмоқда. Шунинг учун ҳам капитализм ҳукм сурган жойларда оддий халқ зўрға кун кечираётган бир пайтда халқ ҳисобидан бойлик орттираётганларнинг хоҳлаганча маишат қилиб яшаётганини кўриш мумкин.
Бу адолатсизликдан қутулиш учун халқнинг мол-мулкини талон-торож қилишга замин яратган капиталистик тузумни бутунлай рад этиб, унинг ўрнига Ислом ҳукмларини ҳаётга жорий қилиш лозим. Чунки Ислом қонун-қоидалари адолатли суд тизимини йўлга қўяди. Шу билан бирга, электр тармоғи ва бошқа табиий бойликлар умумий мулк туркумига киришини ҳамда уларнинг инсонлар ўртасида адолатли тақсимланишини кафолатлайди.
Ҳорун Абдулҳақ
