“75чилар” устидан суд: Ҳокимият савдоси

“75чилар” устидан суд: Ҳокимият савдоси

2 июль куни Бишкек шаҳрининг Биринчи май туман судида жамоатчилик ўртасида “75чиларнинг хати” номи билан танилган шов-шувли жиноий иши бўйича ҳукм ўқилди. Судя Азирет Медеров Миллий хавфсизлик давлат қўмитасининг собиқ раиси Қамчибек Ташиев, Жогорку Кенешнинг собиқ спикери Нурланбек Тургунбек ўғли ва Жўқорғу Кенешнинг собиқ депутати Қурманқул Зулушевларни жиноят кодексининг “Ҳокимиятни куч билан босиб олиш” моддаси билан айбдор деб топиб, уларга тўрт йиллик шартли жазо тайинлади. Қолган фигурантларга ҳам худди шундай жазо белгиланди. Айбланувчиларнинг барча мол-мулки давлат фойдасига мусодара қилинди.

Қамчибек Ташиевнинг адвокати Икрамидин Айтқулов суд ҳукмидан норози эканини айтиб, кейинги суд инстанциясига апелляция шикояти киритишини маълум қилди.

Маълумки, шу йилнинг 10 февраль куни Президент Садир Жапаров Қамчибек Ташиевни Миллий хавфсизлик давлат қўмитаси раиси лавозимидан озод этган эди. Ушбу воқеалардан сўнг Нурланбек Тургунбек ўғли дастлаб спикерлик лавозимидан кетиб, кейинроқ депутатлик мандатини ҳам топширди. “75чиларнинг хати” Жогорку Кенешга келиб тушган кезларда Қурманқул Зулушев парламентнинг Конституциявий қонунчилик, давлат тузилиши, маҳаллий ўзини ўзи бошқариш ва регламент қўмитасига раислик қилаётган эди. Кўп ўтмай, Зулушев бошчилигидаги бир қатор депутатлар ҳам ўз мандатларини топширишди.

Бундан сал аввалроқ Ташиевнинг яна бир сафдоши, собиқ депутат Қундуз Сулайманов уй қамоғига чиқарилгани маълум бўлганди. Буларнинг барчаси шундан далолат берадики, амалдаги ҳокимият Ташиевнинг сиёсий вазнини ҳисобга олган ҳолда ва бўлажак сайловлар яқинлашиб қолгани сабабли сиёсий қарор қабул қилиб, ўзига хос савдога киришди. Зеро, сайлов арафасида Ташиевнинг жамоасига нисбатан қаттиқ жазо чоралари қўлланилиши мамлакатдаги сиёсий вазиятни издан чиқариши мумкин эди. Балки бу унинг қўлидаги компроматларнинг жамоатчиликка ошкор бўлишига ҳамда президентнинг сиёсий нуфузи заифлашишига олиб келиши ҳам эҳтимолдан холи эмас эди.

Шу билан бирга, Жапаров бўлажак сайловда кучли рақиб пайдо бўлишининг олдини олиб, ўз президентлик муддатини узайтиришга замин ҳозирламоқда. Ташиев ва унинг атрофидаги шахсларга нисбатан жиноий ишнинг қўзғатилиши уларни сайлов олдидаги сиёсий жараёнлардан узоқлаштириб, қўл-оёғини боғлаб қўйиш билан баробардир. Негаки, туман судининг қарори ҳали якуний ҳукм эмас. Эҳтимол, бу президентлик сайловигача давом этадиган жараённинг бошланишидир.

Демак, юқоридаги воқеалардан қирғиз халқи тўғри хулоса чиқармоғи лозим. Бу каби сиёсий қарорлар мамлакат демократик йўлни қабул қилганидан буён давом этиб келаётган сурункали ҳолатдир. Юртдаги коррупциявий ўйинлар, оғир жиноятлар ва халқ ризқини қияётган амалдорларнинг қилмишлари сиёсий савдо қуролига айланиб улгурди. Оддий халқ эса солиқларнинг ортиши, янги-янги бож турларининг жорий этилиши, электр энергияси, иссиқ ва совуқ сув каби энг бирламчи коммунал хизматлар тарифларининг қимматлаши, кундалик эҳтиёж моллари нархининг кескин кўтарилиши ва осмонга етган ижара ҳақлари қаршисида чорасиз қолмоқда. Халқнинг фаровонлиги учун хизмат қилиши керак бўлган табиий бойликларимиз эса «инвестор» ниқоби остида хорижликлар, айниқса, хитойликлар томонидан талон-торож қилинмоқда.

Расмий ҳукумат эса реал муаммоларни ҳал этиш ўрнига, даъватчи мусулмон оилаларни таъқиб қилиш, «маски-шоу» (маскали босқинлар) уюштириш орқали жамиятнинг эътиборини сунъий равишда экстремизм ва терроризм мавзулари билан чалғитишга уринмоқда.

Хулоса қилиб айтганда, Қирғизистонда ҳокимиятни ёки давлат раҳбарларини алмаштириш муаммо эмас. Асосий муаммо — минтақадаги мустамлакачи кучларнинг ҳокимият алмашинувидан ўз манфаатлари йўлида фойдаланаётгани ва халқнинг бу ўйинларга алданиб қолаётганидадир. Шундай экан, биз мусулмонлар, у ёки бу ҳукуматнинг ёхуд сиёсий муҳитнинг ўзгаришига учмасдан, Ислом атрофида бирлашиб, Ислом мафкурасини кўтариб чиқиш билангина бу мавҳумлик ва тартибсизликка чек қўя оламиз. Зеро, Ислом нафақат Қирғизистондаги, балки бутун дунёдаги мусулмонларни бирлаштирувчи ягона ҳақиқий кучдир. Фақат Исломгина бугунги сиёсий бўшлиқни тўлдириб, жамиятимизга фаровон ҳаёт тақдим эта олади. Бундан бошқа таклиф қилинаётган йўлларнинг барчаси вақтинчалик сароб ёки мустамлакачиларнинг навбатдаги найрангларидан бошқа нарса эмас.

Мумтоз Мавароуннаҳрий