Қирғизистонда одам ёллашликда айбланган Россия фуқароси озодликка чиқди
Қирғизистонда одам ёллашликда айбланган Россия фуқароси озодликка чиқди
«Mash» Телеграм-каналининг хабар беришича, Қирғизистон суди томонидан ёлловчиликни ташкил этиш ва одамларни Россия армиясига жалб қилишда айбланиб судланган Россия фуқароси 41 ёшли Виктор Васильев 12 июнь куни озодликка чиқарилган. У бир йилу икки ойдан буён тергов ҳибсхонасида сақланаётган эди.
Эслатиб ўтиш жоизки, 2025 йилнинг 14 апрелида Ўш шаҳрида «қирғизистонликларни Украинадаги урушга жалб қилган» деган айблов билан тўрт киши одам ёллашликда гумонланиб қўлга олинган эди. Уларнинг орасида «Рус уйи» (Русский дом) ташкилотининг ходими Наталья Секерина ҳамда Ўш шаҳар ҳокимлигининг Ахборот таъминоти бўлими бош мутахассиси Сергей Лапушкин ҳам бор эди. Қолган икки кишининг исмлари ошкор қилинмаётган эди. Кейинчалик, 24 апрель куни Россия оммавий ахборот воситалари Ўшда ёлламачиликда айбланиб ҳибсга олинган тўрт кишидан бири россиялик Виктор Васильев эканини эълон қилди.
Бир қатор оммавий ахборот воситаларининг ёзишича, Васильевнинг фамилияси илгариги Луковенко бўлган. У миллатчилик қарашларга эга бўлиб, 2011 йилда «Рус марши» деб номланган намойиш кунида Шри-Ланка фуқаросини ўлдиришда айбланиб, саккиз йилга ҳукм қилинган. Қамоқда беш йил ўтиргач, муддатидан олдин шартли равишда озодликка чиққан.
Шунингдек, Луковенконинг «Вагнер» хусусий ҳарбий компанияси асосчиси Евгений Пригожин томонидан тузилган тузилмаларда «сиёсий технолог» сифатида фаолият юритгани, Африка ва Украинада иш олиб боргани ҳамда Россия разведка хизматлари билан алоқадор бўлгани ҳақида ҳам маълумотлар бор.
