Ташиевга нисбатан жиноий иш қўзғатилди
Ташиевга нисбатан жиноий иш қўзғатилди
Миллий хавфсизлик давлат қўмитасининг собиқ раиси Камчибек Ташиев 29 апрель куни Ички ишлар вазирлигига сўроққа чақирилиб, унга нисбатан жиноий иш қўзғатилди. Бу ҳақда унинг адвокати Икрамидин Айткулов маълум қилди.
Олинган маълумотларга кўра, Ташиевга нисбатан Жиноят кодексининг «ҳокимиятни куч билан босиб олишга уриниш…» ва «мансаб ваколатини суиистеъмол қилиш» моддалари бўйича айблов эълон қилиниб, яшаш жойини тарк этмаслик ҳақидаги тилхат асосида уй қамоғига чиқарилган. Ташиев ўзига нисбатан жиноий иш қўзғатилганини тасдиқловчи баёнот бериб, тарафдорларини ва жамоатчиликни ҳеч қандай кескин ҳаракатлар ёки намойишлар ўтказмасликка чақирди.
Маълум бўлишича, Ташиев билан бир қаторда собиқ Бош прокурор Зулушев ва собиқ спикер Тургунбек уғли ҳам сўроқ қилиниб, қўйиб юборилган.
Маълумки, Ташиевга нисбатан қўзғатилган жиноий ишнинг замирида жорий йилда президентлик сайловларини ўтказиш ташаббуси билан чиққан 75 кишининг мурожаати ётибди. Мазкур воқеалардан сўнг Ташиев бошчилигидаги Миллий хавфсизлик давлат қўмитасининг раҳбарлари лавозимидан озод этилиб, бир қанча депутатлар ўз мандатларини топширишган эди.
Президент Жапаровнинг Москвага қилган сафаридан сўнг Ташиевнинг сўроққа чақирилиши диққатга сазовордир. Давлат раҳбари ушбу сафар якунлари бўйича берган интервьюсида Владимир Путин билан барча асосий масалалар юзасидан келишиб олганини таъкидлаган эди. Бундан хулоса қилиш мумкинки, давлат раҳбарияти ташқи сиёсатда Россия изидан боришини тасдиқлаб, бунинг эвазига Путин ички сиёсий жараёнларни Жапаровнинг ихтиёрига қолдирган бўлиши эҳтимолдан холи эмас.
Демак, мамлакатда бошқарув тизими тобора диктатурага қараб кетаётганини ва жамоатчилик назоратини кучайтиришга қаратилган қонунлар қабул қилинаётганини инобатга олсак, Жапаров бўлажак сайловларда ўзига тўсқинлик қилиши мумкин бўлган асосий кучларни саҳнадан четлатишга уринмоқда. Зеро, юқоридаги сиёсатчиларга нисбатан жиноий иш қўзғатилиши уларнинг сиёсий жараёнларда иштирок этишини чеклайди. Бу эса ҳокимиятнинг бир қўлда тўпланишига ва диктаторлик режими ўрнатилишига йўл очади.
Хулоса ўрнида айтиш жоизки, халққа, хусусан мусулмонларга нисбатан адолатсизлик ва зулм қилган раҳбарлар, шубҳасиз, ўз жазосини олиши лозим. Бироқ, бу жараён ҳокимиятнинг диктатурага айланишига ва халқ устидаги зулмнинг янада кучайишига йўл очмаслиги керак. Шу боис, халқ ўз қўлидаги улкан кучдан фойдаланиб, ҳукуматнинг ҳар бир адолатсиз қадамини тафтиш қилиши ва ёмонликлардан қайтаришга ҳаракат қилиши шарт. Айниқса, Ислом ва мусулмонларга нисбатан таъқиблар тўхтатилишини талаб қилиш бугунги куннинг муҳим вазифаси ҳисобланади. Зеро, Исломда ҳокимларни муҳосаба қилиш мусулмонларнинг бурчидир. Расулуллоҳ соллаллоҳу алайҳи васаллам шундай марҳамат қилганлар:
“مَنْ رَأَى مِنْكُمْ مُنْكَرًا فَلْيُغَيِّرْهُ بِيَدِهِ، فَإِنْ لَمْ يَسْتَطِعْ فَبِلِسَانِهِ، فَإِنْ لَمْ يَسْتَطِعْ فَبِقَلْبِهِ، وَذَلِكَ أَضْعَفُ الْإِيمَانِ”
«Сизлардан ким мункарни кўрса, уни қўли билан ўзгартирсин. Агар бунга қодир бўлмаса, тили билан ўзгартирсин. Агар бунга ҳам қодир бўлмаса, қалби билан (норози бўлсин) ва бу иймоннинг энг заифидир» (Имом Муслим ривояти).
Ушбу ҳадис умумий бўлиб, давлат раҳбарларини муҳосаба қилишни ҳам ўз ичига олади.
Мумтоз Мавароуннаҳрий
