Америка Конгресси Эронга қарши урушни қўллаб-қувватлайди, аммо халқ бунга қарши
Америка Конгресси Эронга қарши урушни қўллаб-қувватлайди, аммо халқ бунга қарши
2026 йил июль куни Туркиянинг «Анадолу» агентлиги АҚШ Конгрессининг демократ аъзолари Эронга қарши урушни тўхтатиш учун овозга қўйиладиган янги қонун лойиҳасини тақдим этгани, бироқ республикачилар уни ўтказмай қўйгани ҳақида хабар берди.
Изоҳ:
Яҳудий вужуди Ғазода, Ливанда ва бошқа ҳудудларда содир этаётган қатлиомлар демократиянинг яроқсизлигини яшириб келган улкан муз қатламини эритиб юборди. Бугун эса Американинг яҳудий вужуди билан ҳамкорликда олиб бораётган уруши ўша музнинг қолган қисмини ҳам эритиб, демократиянинг яроқсизлигини яққол намоён қилмоқда. Шу тариқа, Ғарб бир асрдан ортиқ вақт мобайнида мақтаб келган бу тузумнинг ҳақиқий башараси очилиб қолди.
Биринчидан, шуни таъкидлаш жоизки, Ғарбдаги жамоатчилик ўртасида ўтказилган сўровлар кўп ҳолларда ишончли бўлади. Кўпинча турли сайловлар арафасидаги сўровлар юқори даражада аниқ чиққан, кейинчалик сайлов натижалари ҳам буни тасдиқлаб келган.
Иккинчидан, американликларнинг урушларни истамасликлари Трампни сайлашдаги асосий омиллардан бири эди. Чунки бу Трампнинг сайловолди шиорларидан бири бўлиб, у сайловчилар олдида мазкур ваъдасига қатъий амал қилиши лозим эди. Ҳатто у АҚШнинг собиқ президентларини кўплаб инсонларнинг ҳаётига зомин бўлган ва улкан маблағларнинг зое кетишига сабаб бўлган урушларни келтириб чиқарганликда айблаб келган эди. Бироқ бугун Трамп – Эрон Американинг манфаатларига ҳеч қандай тажовуз қилмаганига қарамай – унга қарши уруш бошлашни истади. Бошқача айтганда, Трампнинг ҳаракати мудофаа уруши эмас эди, демак уни оқлаш учун ҳеч қандай асос йўқ. Шунга қарамай, у урушни бошлади.
Бундай вазиятда Конгресс уни тўхтатиши керак эди. Дарҳақиқат, бир неча ҳафта олдин Конгресс бу урушни тўхтатган эди. Бироқ кейинчалик Трамп Конгресс аъзоларига босим ўтказиш орқали масалани қайтадан овозга қўйдирди. Натижада Конгресс ўзининг аввалги қарорини ўзи бекор қилди. Ҳолбуки, ушбу Конгресс ҳам халқнинг вакили ҳисобланиб, демократик йўл билан сайланган эди!
Шу билан бирга, жамоатчилик ўртасида ўтказилган барча сўровлар Америка халқининг мутлақ кўпчилиги урушга кескин қарши эканини кўрсатмоқда. Аммо президент бу урушни хоҳлади. Шу боис у урушни бошлаб, уни давом эттирмоқда. Конгресс ҳам у билан биргаликда бу урушни қўллаб-қувватлаб, уни тўхтатишни истаган ўз аъзоларига қарши овоз бермоқда.
Буларнинг барчаси демократия бир водийда бўлса, бошқарувчиларнинг ҳаракатлари бошқа бир водийда эканини кўрсатмоқда. Улар ўзларини халқнинг вакили ва халқ томонидан сайланган деб аташса-да, президент сайлов олдидан урушга қарши эканини эълон қилди. Унинг партиясига мансуб Конгресс аъзолари ҳам сайлов вақтида шундай баёнотлар беришди. Кейинчалик барча жамоатчилик ўртасида ўтказилган сўровлар халқ бу урушга қатъиян қарши эканини кўрсатса-да — ҳатто бу ҳолат фақат демократлар орасида эмас, балки республикачилар ўртасида ҳам кузатилганига қарамай — шундай қарорлар қабул қилинмоқда. Буларнинг барчаси халқ ва сайловнинг бошқарувга ҳеч қандай дахли йўқлигини билдиради. Аксинча, бу халқни алдаш учун қўлланиладиган восита бўлиб, бунда раҳбар халқнинг вакили сифатида кўрсатилади ва одамлар ҳар бир раҳбарни сайлаш билан овуниб қолишади. Шундан сўнг эса бошқарув халқнинг эмас, балки ҳукмрон доираларнинг хоҳиши билан юритилади. Халқнинг фикри жамоатчилик сўровларида қанчалик очиқ кўринмасин ёки сайланган раҳбарларнинг ҳаракатлари урушларга қарши бўлган халқ иродасига зид келмасин, буларнинг ҳеч бири бошқарувга таъсир кўрсата олмайди.
Шунингдек, Ғарбда яҳудий вужудининг Ғазода ва Ливанда содир этган ваҳшийликларига қарши кучли норозилик кайфияти мавжудлигига қарамай, Ғарб ҳукуматлари яҳудий вужудининг мазкур жиноятларни амалга ошириши учун уларга қурол-яроғ ва ўқ-дорилар етказиб беришни давом эттиришлари ҳар бир ақли расo инсонга демократиянинг бузуқ тузум эканини кўрсатиб турибди. Унинг атрофидаги барча порлоқ ташвиқот ва тарғиботлар эса демократиянинг асл башараси очилиб қолмаслиги учун одамларнинг кўзини бўяшдан бошқа нарса эмас.
Ғарбнинг бу тузуми мамлакат бойликларининг деярли барчасини оз сонли кишиларнинг қўлида тўпланишига ва уларнинг шахсий ҳисоб рақамларига йиғилишига имкон беради. У бойликдан фақатгина ўша тор доирадаги озчилик кишиларгина фойда кўради холос, халқ эса қуруқ қолаверади.
Билал Ат-Тамимий
