Одил имом

بِسْمِ اللهِ الرَّحْمٰنِ الرَّحِيمِ

Ҳадиси Шариф билан

Одил имом

Азиз мухлислар, “Ҳадиси Шариф билан” номли рукнимизнинг янги сонини самимий саломлар билан бошлаймиз. Сизларга Аллоҳ Таолонинг саломи, раҳмати ва баракоти бўлсин.

Бу ҳақда «Жомиъ ат-Термизий»нинг шарҳи «Туҳфат ал-Аҳвазий» китобида «Одил имом ҳақида келган ривоятлар» бобида шундай дейилади:

حَدَّثَنَا عَلِيُّ بْنُ الْمُنْذِرِ الْكُوفِيُّ حَدَّثَنَا مُحَمَّدُ بْنُ فُضَيْلٍ عَنْ فُضَيْلِ بْنِ مَرْزُوقٍ عَنْ عَطِيَّةَ عَنْ أَبِي سَعِيدٍ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: إِنَّ أَحَبَّ النَّاسِ إِلَى اللَّهِ يَوْمَ الْقِيَامَةِ وَأَدْنَاهُمْ مِنْهُ مَجْلِساً، إِمَامٌ عَادِلٌ وَأَبْغَضَ النَّاسِ إِلَى اللَّهِ وَأَبْعَدَهُمْ مِنْهُ مَجْلِساً، إِمَامٌ جَائِرٌ

Али ибн ал-Мунзир ал-Куфий бизга Абу Саъиддан шундай ривоят қилди: Аллоҳнинг элчиси ﷺ айтдилар: «Қиёмат куни Аллоҳ Таолога энг севимли ва Унга энг яқин бўладиган инсон – одил имомдир. Аллоҳ Таолога энг ёқимсиз ва Ундан энг узоқ бўладиган инсон эса – золим имомдир».

(إن أحب الناس) — «одамларнинг энг севимлиси» деган сўз Ал-Қорий айтганидек, «Аллоҳга энг маҳбуб инсон» маъносини билдиради. Ал-Манавий эса: «Аллоҳнинг унга бўлган муҳаббатидан бахтиёр бўлган инсон», деган.

(وأدناهم) — «ва уларнинг энг яқини». Ал-Қорий: «Аллоҳга мақоми ва даражаси жиҳатидан энг яқин бўлганлар», деган маънони англатади. Ал-Манавий эса: «Уларнинг ичида Аллоҳнинг ҳурматига энг яқин ва Унинг наздида энг юксак мавқедаги инсон», деган.

(إمام جائر) “Золим имом” адолатсиз раҳбар» деганидир.

Ҳурматли биродарлар:

Қосим бин Муҳаймрадан ривоят қилинади:

«Сизнинг замонангиз — бу сизнинг бошқарувчингизни акс эттиради. Агар раҳбарингиз одил бўлса, замонангиз ҳам адолатли бўлади. Агар раҳбарингиз золим бўлса, замонангиз ҳам золим бўлади».

Ривоят қилинишича, Халифа Умар бин Абдулазиз халифликни қўлга олгандан сўнг, Ҳасан ал-Басрийга мактуб йўллаб, одил имомнинг сифатлари ҳақида сўради. Ҳасан ал-Басрий унга қуйидагича жавоб ёзди: «Эй мўминларнинг амири, шуни унутмангки, Аллоҳ Таоло одил имомни ҳар бир қийшайиб қолган нарсанинг таянчи, ҳар бир мазлумнинг ёрдамчиси, ҳар бир бузуқ кишининг ислоҳ қилувчиси, ҳар бир заифнинг қудрати, ҳар бир ҳақи топталган инсоннинг адолати ва ҳар бир қийналган кишининг паногоҳи қилиб қўйгандир.  Эй мўминларнинг амири, одил имом — ўз туяларига меҳрибон бўлган, уларни энг яхши яйловларга ҳайдаб бордиган, хавф-хатарлардан асрайдиган, йиртқичлардан ҳимоя қиладиган, жазирама иссиқ ва турли зарарлардан сақлайдиган қатъиятли ҳамда ғамхўр сарбон кабидир. Эй мўминларнинг амири, одил имом — ўз фарзандига меҳрибон, шафқатли ва мунис она кабидир. У фарзандини машаққат билан кўтариб юради, қийинчилик билан дунёга келтиради ва гўдаклик пайтидан бошлаб тарбиялаб вояга етказади. У боласи уйғоқ бўлса ухламайди, боласи роҳатда дам олсагина ўзи ҳам ором олади. Гоҳида эмизади, гоҳида эса кўкракдан ажратади. Фарзандининг қувончидан севинади, дарду ташвишидан эса қайғуга ботади».

Эй мусулмонлар: Сизларнинг раҳбарларингизда шундай сифатлар борми? Бошингиздан нелар ўтаётганини кўрмаяпсизларми? Аввалига раҳбарларимизнинг кичик камчиликларини кўра бошладик, сўнгра уларнинг хиёнатларини ҳис қила бошладик, бугун эса уларни ҳар томонлама ахлоқсизлик ва бузуқлик ўраб олганини кўриб турибмиз. Уларнинг бузуқлигини таърифлашга тил ожиз. Уларнинг Ислом умматига қилган хиёнатларини тўлиқ баён қилишга араб тилининг сўз бойлиги ҳам етмай қолди. Ҳозирда биз уларнинг адолатли ёки золим экани ҳақида сўз юритишимизга ҳожат йўқ. Шундай экан, уларнинг Қиёмат куни Аллоҳ Таоло ҳузуридаги ҳоли қандай кечади? Биз Аллоҳдан мағфират ва омоналик сўраймиз.

Азиз биродарлар, навбатдаги «Ҳадиси Шариф билан» номли рукнимизгача Аллоҳ Таолонинг паноҳида бўлинг. Сизларга Аллоҳ Таолонинг саломи, раҳмати ва баракоти бўлсин.

Ҳижрий 1448 йил, 29-муҳаррам.

Милодий 2026 йил, 14-июл.