Халқаро кун тартиби ва ички муаммолар
Халқаро кун тартиби ва ички муаммолар
Қирғизистон Хавфсизлик кенгаши котиби Адилет Орозбеков Нью-Йорк шаҳрида бўлиб ўтган БМТнинг терроризмга қарши кураш ҳафталигида иштирок этди. Конференция давомида у Қирғизистоннинг терроризм ва экстремизмга қарши кураш, ёшларнинг радикаллашувини олдини олиш ҳамда низоли ҳудудлардан қайтариб олиб келинган фуқароларни реабилитация қилиш борасида амалга ошираётган чора-тадбирлари ҳақида сўз юритди. Шунингдек, у 2026–2030 йилларга мўлжалланган терроризмни молиялаштиришга қарши кураш бўйича янги стратегия тайёрланаётганини ҳам маълум қилди.
Изоҳ
Ушбу янгиликка сиёсий нуқтаи назардан ёндашадиган бўлсак, табиий равишда «Нима учун бугунги кунда айнан терроризмга қарши кураш Қирғизистон учун бош мавзулардан бири сифатида кун тартибига олиб чиқилмоқда?», деган савол туғилади.
Яқинда Қирғизистон БМТ доирасида янги мақомга эга бўлди. Бу эса мамлакатнинг халқаро майдондаги роли аввалгига қараганда анча сезиларли тус олганидан далолат беради. Ҳукумат шу йўл билан БМТ мақсадларини қўллаб-қувватлашини ҳамда глобал муаммоларни ҳал этишда фаол иштирок этаётганини кўрсатишга интилмоқда. Кўп йиллардан буён Ғарб дунёси томонидан сингдириб келинаётган ана шундай мавзулардан бири — халқаро хавфсизлик ва терроризмга қарши кураш масаласидир.
Бироқ, оддий фуқароларнинг аксарияти учун хавфсизлик тушунчаси мутлақо бошқача кўринишга эга. Халқни кўпроқ нарх-навонинг кўтарилиши, даромадларнинг пастлиги, тиббиёт ва таълим сифатининг ўта ночорлиги, йўлларнинг абгорлиги, ишсизлик, коррупция, коммунал муаммолар ва кўчалардаги жиноятчилик ташвишга солади. Айнан мана шу муаммолар халқнинг турмуш даражасига кундалик равишда тўғридан-тўғри таъсир кўрсатиб келмоқда.
Бундан кўриниб турибдики, расмий кун тартиби билан жамиятнинг асл талаб-истаклари икки айро дунёда яшамоқда. Халқаро даражадаги баёнотларда терроризмга қарши курашга содиқлик бот-бот таъкидланаётган бўлса-да, амалда гап кўпинча Исломга қарши қаратилган сиёсат ҳақида бормоқда. Халқ эса, энг аввало, ижтимоий-иқтисодий муаммоларнинг ҳал этилишини интизорлик билан кутмоқда ва шу билан бирга уларнинг эртанги кунга бўлган ишончи ҳам борган сари сўниб бормоқда.
Аслида, давлат ташқаридан тиқиштирилаётган қарашларга хушмадгўйлик қилмасдан, ўз хавфсизлигини таъминлаш пайида бўлиши ва бунинг учун барча халқаро минбарлардан унумли фойдаланиши лозим. Айниқса, бугунги кунда терроризм таҳдиди Қирғизистон учун қанчалик долзарб эканлиги ҳамон мавҳумлигича қолмоқда. Шу боис, ўз фуқароларининг энг оғриқли талаблари кўтарилаётган бир шароитда, бу каби баёнотлар берилиши — шунчаки халқаро майдондаги сохта фаолликни ва глобал кун тартибига сиёсий содиқликни кўрсатишга бўлган уриниш сифатидагина қабул қилинмоқда.
Абду Шукур
